ທີ່ຕັ້ງ ແລະ ພາລະບົດບາດ
ກົມການຈັດຫາງານ ຂຽນຫຍໍ້ວ່າ: “ກຈງ” ແມ່ນການຈັດຕັ້ງໜື່ງ ສັງກັດໃນໂຄງປະກອບກົງຈັກຂອງກະຊວງແຮງງານ ແລະ ສະຫວັດດີການສັງຄົມ ມີພາລະບົດບາດເປັນເສນາທິການໃຫ້ແກ່ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໃນວຽກງານການຈັດຫາງານ ໃນຂອບ ເຂດຄວາມຮັບຜິດຊອບຂອງກະຊວງແຮງງານ ແລະ ສະຫວັດດີການສັງຄົມ.
ໜ້າທີ່
- ຄົ້ນຄວ້າ, ເຊື່ອມຊືມ ແລະ ຈັດຕັ້ງຜັນຂະຫຍາຍແນວທາງ, ນະໂຍບາຍຂອງພັກ, ກົດໝາຍ ແລະ ລະບຽບການຕ່າງໆຂອງລັດເພື່ອການບໍລິຫານ ແລະ ຄຸ້ມຄອງວຽກງານການຈັດຫາງານ
- ຄົ້ນຄວ້າ, ສ້າງ, ປັບປຸງນິຕິກໍາ, ແຜນຍຸດທະສາດ, ກົນໄກ, ແຜນງານ, ໂຄງການ ແລະ ແຜນງົບປະມານກ່ຽວກັບວຽກງານການຈັດຫາງານໃນແຕ່ລະໄລຍະ.
- ໂຄສະນາເຜີຍແຜ່ນິຕິກໍາ, ນະໂຍບາຍ, ແຜນຍຸດທະສາດກ່ຽວກັບວຽກງານການຈັດຫາງານ
ຄົ້ນຄວ້າ, ກໍານົດ ແລະ ວາງແຜນຈັດຕັ້ງປະຕິບັດການດັດສົມມະຫາພາກດ້ານຄວາມຕ້ອງການ ແລະ ການສະໜອງຂອງຕະຫຼາດແຮງງານ
- ຊຸກຍູ້, ສົ່ງເສີມ ແລະ ເປັນໃຈກາງ ໃຫ້ທຸກພາກສ່ວນທົ່ວສັງຄົມ ໄດ້ມີສ່ວນຮ່ວມຢ່າງຕັ້ງໜ້າ ເພື່ອໃຫ້ພົນລະເມືອງລາວໄດ້ມີວຽກເຮັດງານທຳ ຕາມຕໍາແໜ່ງງານໃນຫົວໜ່ວຍແຮງງານ ແລະ ການປະກອບອາຊີບແບບອິດສະຫຼະ ຢູ່ໃນຕົວເມືອງ ແລະ ຊົນນະບົດ ແລະ ຈັດຫາງານໄປຕ່າງປະເທດ.
- ສ້າງ, ປັບປຸງ, ຄຸ້ມຄອງ ລະບົບຂໍ້ມູນຂ່າວສານຕະຫຼາດແຮງງານ ເພື່ອຕິດຕາມການເຄື່ອນໄຫວຂອງຕະຫຼາດແຮງງານ ແນໃສ່ເຮັດໃຫ້ການແກ້ໄຂບັນຫາການວ່າງງານ ແລະ ການຂາດແຄນແຮງງານຢູ່ ສປປລາວ ໃຫ້ມີປະສິດທິພາບ.
- ສົ່ງເສີມ ແລະສ້າງຄູ່ມືການແນະນໍາອາຊີບແກ່ຜູ້ທີ່ຈະເຂົ້າສູ່ຕະຫຼາດແຮງງານ ແລະ ການຂາດແຄນແຮງງານຢູ່ ສປປລາວ ໃຫ້ມີປະສິດທິພາບ
- ສ້າງນະໂຍບາຍເພື່ອສົ່ງເສີມການປະກອບອາຊີບອິດສະຫຼະ, ສົ່ງເສີມໃຫ້ມີການນໍາໃຊ້ແຮງງານທ້ອງຖິ່ນເຂົ້າໃນວຽກສາທາລະນະ ໂດຍສະເພາະ ສໍາລັບແຮງງານທີ່ຢູ່ໃນຊົນນະບົດ ເພື່ອຫຼຸດຜ່ອນ ຫຼື ປ້ອງກັນການເຄື່ອນຍ້າຍໄປພື້ນທີ່ອື່ນໂດຍບໍ່ຈໍາເປັນ
- ຂື້ນທະບຽນຜູ້ຊອກຫາວຽກເຮັດງານທໍາ, ຜູ້ວ່າງງານ, ຕໍາແໜ່ງງານວ່າງ ແລະ ຜູ້ມີວຽກເຮັດງານທໍາໃນຂອບເຂດທົ່ວປະເທດ
- ຊຸກຍູ້, ສົ່ງເສີມ ແລະ ສະເໜີສ້າງຈຸດບໍລິການຈັດຫາງານ, ສູນຂໍ້ມູນຂ່າວສານສໍາລັບແຮງງານເຄື່ອນຍ້າຍ, ບໍລິສັດຈັດຫາງານພາຍໃນ ແລະ ໄປຕ່າງປະເທດ, ຕິດຕາມ ແລະ ຄຸ້ມຄອງ ການເຄື່ອນໄຫວຂອງຈຸດບໍລິການ ແລະ ບໍລິສັດຈັດຫາງານ ໃຫ້ມີປະສິດທິພາບ ສອດຄ່ອງກັບກົດໝາຍ ແລະ ລະບຽບການ
- ຄົ້ນຄວ້າ ແລະ ປະກອບຄໍາເຫັນຕໍ່ການສະເໜີຂໍອະນຸມັດສ້າງຕັ້ງ, ໂຮມ, ແຍກ, ຍຸບເລີກ ແລະ ຍ້ອງຍໍ ຜົນການເຄື່ອນໄຫວຂອງສະມາຄົມບໍລິສັດຈັດຫາງານ
ຄົ້ນຄວ້າ ແລະ ສະເໜີຂັ້ນເທິງເພື່ອພິຈາລະນາອະນຸມັດການຂະຫຍາຍຕະຫຼາດແຮງງານໄປຕ່າງປະເທດ
- ດໍາເນີນການບໍລິການຈັດຫາງານໃຫ້ຜູ້ຊອກຫາວຽກເຮັດງານທໍາ ຢູ່ພາຍໃນ ແລະ ຈັດສົ່ງໄປເຮັດວຽກຢູ່ຕ່າງປະເທດ ໃນຮູບແບບລັດຕໍ່ລັດ ແລະ ຕາມການຕົກລົງຂອງ ສອງຝ່າຍ
- ຄົ້ນຄວ້າ, ອະນຸມັດການຈັດສົ່ງ ແລະຄຸ້ມຄອງ ການຈັດສົ່ງແຮງງານລາວໄປເຮັດວຽກ ແລະ ໄປຝຶກເຮັດວຽກຢູ່ຕ່າງປະເທດ
- ຄົ້ນຄວ້າ, ສັງລວມ, ດັດສົມ ແລະ ສະເໜີຄະນະນໍາເພື່ອພິຈາລະນາແຜນນໍາໃຊ້ແຮງງານຕ່າງປະເທດ ໃນຂອບເຂດທົ່ວປະເທດ ທຸກໆ 6 ເດືອນ
- ຄົ້ນຄວ້າ, ອະນຸມັດ ແລະ ຄຸ້ມຄອງ ການຈັດການຕະຫຼາດແຮງງານ ໃນຂັ້ນສູນກາງ
- ຄຸ້ມຄອງ ແລະ ຕິດຕາມ ການຮັບສະໝັກງານ ໃນຂອບເຂດທົ່ວປະເທດ
- ຄົ້ນຄວ້າ, ປະສານສົມທົບ ແລະ ສະເໜີນໍາໃຊ້ເງິນກອງທຶນຊ່ວຍເຫຼືອແຮງງານລາວທີ່ເຮັດວຽກຢູ່ຕ່າງປະເທດ ແລະ ແຮງງານຕ່າງປະເທດທີເຮັດວຽກຢູ່ ສປປ ລາວ
- ສົມທົບກັບພາກສ່ວນກ່ຽວຂ້ອງ ເພື່ອຕິດຕາມການເກັບລາຍຮັບຄ່າທຳນຽມ, ຄ່າບໍລິການ, ຂື້ນແຜນນໍາໃຊ້ ແລະ ສະຫຼຸບລາຍງານຕາມລະບຽບການ
ຂອບເຂດ
- ສະເໜີສ້າງຕັ້ງ, ປັບປຸງ ຫຼື ຍົກເລີກກົງຈັກ ແລະ ຕໍາແໜ່ງງານຂອງກົມ ຕໍ່ລັດຖະມົນຕີ ເພື່ອພິຈາລະນາ
- ຕິດຕາມ, ກວດກາການຈັກຕັ້ງປະຕິບັດນະໂຍບາຍ, ກົດໝາຍ, ດໍາລັດ, ຂໍ້ຕົກລົງລະບຽບການຕ່າງໆ ກ່ຽວກັບວຽກງານຈັດຫາງານພາຍໃນ, ຈັດຫາງານໄປຕ່າງປະເທດ, ສົ່ງເສີມການປະກອບອາຊີບ ແລະ ຂໍ້ມູນຂ່າວສານຕະຫຼາດແຮງງານ
- ກວດກາ, ກ່າວເຕືອນ, ພິຈາລະນາ ແລະ ນໍາສະເໜີຂັ້ນເທິງ ຕໍ່ ຫຼື ຖອນໃບອະນຸຍາດສ້າງຕັ້ງ ແລະ ເຄື່ອນໄຫວວິສາຫະກິດບໍລິການຈັດຫາງານ ຫຼື ສັນຍາດ້ານວິຊາການ ໃນກໍລະນີທີ່ບໍ່ສາມາດປະຕິບັດຕາມມາດຕະຖານວຽກງານ ແລະ ລະບຽບກົດໝາຍອື່ນ
- ສະເໜີຂັ້ນເທິງແຕ່ງຕັ້ງພະນັກງານພາຍໃນກົມ ແລະ ພະນັກງານທ້ອງຖິ່ນ ເຂົ້າຮ່ວມປະຊຸມ, ສໍາມະນາ, ຝຶກອົບຮົມ, ທັດສະນະສຶກສາຢູ່ພາຍໃນ ແລະ ຕ່າງປະເທດ
- ປະສານສົມທົບ, ຮ່ວມມື, ພົບປະ, ເຈລະຈາ, ເຊັນບົດບັນທຶກຄວາມເຂົ້າໃຈ, ສັນຍາ, ຂໍ້ຕົກລົງຕ່າງໆ ທີ່ພົວພັນກັບວຽກງານຈັດຫາງານພາຍໃນ, ຈັດຫາງານໄປຕ່າງປະເທດ, ສົ່ງເສີມການປະກອບອາຊີບ ແລະ ຂໍ້ມູນຂ່າວສານຕະຫຼາດແຮງງານ ກັບບັນດາອົງການຈັດຕັ້ງທີ່ກ່ຽວຂ້ອງທັງພາຍໃນ ແລະ ຕ່າງປະເທດ ຕາມການອະນຸມັດຂອງຄະນະນໍາກະຊວງ
- ຄຸ້ມຄອງຂໍ້ມູນ, ນໍາໃຊ້ງົບປະມານ, ວັດຖຸອຸປະກອນ, ສິ່ງອໍານວຍຄວາມສະດວກ, ພາຫະນະຕ່າງໆ ແລະ ຊັບສິນລວມ ທີ່ຢູ່ໃນຄວາມຮັບຜິດຊອບຂອງກົມ
- ເຊັນເອກະສານທາງລັດຖະການຂອງກົມພາຍໃນກະຊວງ ຕາມຂອບເຂດຄວາມຮັບຜິດຊອບຂອງຕົນ
- ປະຕິບັດສິດອື່ນ ຕາມການມອບໝາຍຂອງຂັ້ນເທິງ
